أحمد عمار وخلاصة تجربته مع السيارات الكهربائية

أولا …هل السيارات الكهربائية مُمتعة ؟!

ده السؤال اللي بيحبوا السواقة هيسئلوه في الأول ! …..الإجابة ببساطة هي “أه” …العربيات الكهربائية مُمتعة بكذا طريقة …
لو إنت عاوز “تأنتخ” وتركب عربية “مريحة” في سواقتها هتلاقي ميزة “مختلفة” في النوعية دي من العربيات …وهي فكرة “الدواسة الواحدة” …يعني تستخدم بدال البنزين “أو الكهربا” بمعنى أصح ! تدوس عليه العربية تمشي …تشل رجلك العربية تهدي …. !! زي عربيات الملاهي !! 
ولو الدنيا زحمة وانت ماشي على سرعة بسيطة هتلاقي العربية “بتقف” ….الحركة دي هتلاقيها في عربيات زي بي إم دابليو i3 و نيسان ليف من الجيل الثاني وتيسلا موديل إس ….ده كمان في عربيات زي التيسلا مُمكن “تلغي” الحركة دي لو مضيقاك !
المتعة كمان هتيجي من “الهدوء” الرهيب ! فكرة إن مفيش أصوات زي صوت طرمبة بنزين وصوت الموتور والشكمان دي فكرة ليها حلاوتها في “أغلب” الأحيان !
نيجي بقى “لشكل” حركة العربية الكهربائية ….أغلب العربيات دي بتيجي ببطاريات أيون الليثيوم الكبيرة و”الثقيلة” اللي بتثببت في “بطن” العربية تحت الكراسي …وده هيخلي مركز ثٌقل العربية قريب من الارض ..ود هيخلي معدلات التماسك والإنزان هايلة !
طيب هل العربيات دي سريعة ؟!

الحقيقة إن من ضمن المزايا المهمة للعربيات الكهربائية إن عزم دوران مُحركات العربيات دي بيظهر “مرة واحدة ” العزم بيظهر بشكل لحظي وسريع والفتيس اللي بيجي من سرعة واحدة بيقسم العزم ده …..ففي النهاية هتحس ان العربية نشيطة جدا حتى لو العربية مش سريعة أوي في العموم ..مع العلم بأن مُعظم العربيات دي متجبش سرعة عالية …150 كم / ساعة في الأغلب …مفيش غير عربيات تيسلا هي اللي بتيجي بأداء “فريد” ….
طيب نيجي لنقطة مُهمة أوي ….عربيات تيسلا حاجة …وباقي العربيات الكهربائية حاجة تانية خالص ! تيسلا موديل إس P100D …هي واحدة من أسرع العربيات على الكرة الأرضية في التسارع من 0 – 200 كم/ ساعة ! تسارعها في الحيذ ده أسرع من أغلب العربيات الخارقة في العالم ! إحنا بنتكلم من 0- 100 كم/ ساعة في 2.4 ثانية !! ده رقم تسارع بوغاتي فيرون ! أنا جربت تيسلا وبوغاتي …التيسلا بتوفر نفس مستوى “ابهار” عربية بوغاتي بس “بسكوت” ومن غير “دراما” ….طبعا بعد الـ 200 كم / ساعة الاداء بيقل ….والعربية مقفولة على 250 كم/ ساعة …يعني انت لو بتحب السواقة …تيسلا موديل إس هتجننك ! بس متسخنش أوي كدة …العربية دي سعرها بتبدأ “فاضية” من 2 مليون جنيه …وبتطلع لأكتر 3.5 مليون جنيه مصري …وشراها صعب أوي أوي وفي طوابير واقفة حجزاها !

هل سكوت العربيات دي “قاتل” ؟!!

لا قاتل ولا حاجة ولا هتحس بيه أساسا …مفيش غير العربيات الكهربائية الرياضية أو “القوية” هي اللي هتزعل انها ساكتة ومن غير صوت …

طيب هل العربيات دي عملية ؟!

الحقيقة …أقدر أٌقول إن الاجابة هي “اه” و “لأ” …وأكيد إن الوضع “بدري” أوي اننا نشتري العربيات دي في مصر ……..ليه ؟! هشرح ليكم! 
أنا جربت تيسلا موديل إس “أكتر عربية كهربائية متطورة ” في دولة الإمارات …وفي دبي تحديدا …واحدة من أكثر عواصم الإقليم تقدما َ … وكان استخدام العربية الكهربائية دي فيها “متعب” وعاوز “تعود” …عاوز تغير من “شكل حياتك” ….زي كدة لما تبقى “مكلبز” وعاوز تخس وتدخل الرياضة في حياتك ! نفس الفكرة ….لازم علشان تشتري عربية كهربائية تغير من “طريقة حياتك” !
مثلا …علشان أشحن العربية التيسلا “بسرعة” كنت لازم أروح لمحطات الشحن السريعة لتيسلا “Supercharger stations” …..أقرب محطة ليا كانت في حتة اسمها The last exit……في مكانين منوا …كل واحد على بُعد 50 كم من وسط البلد …يعني 100 كم علشان اروح أشحن وأرجع ….الشاحن ده بيشحن العربية في “40 دقيقة” …رقم كويس …بس على أرض الواقع الزمن ده “مٌمل” …..العربية رسمي بتمشيك أكتر من 500 كم وممكن توصل لـ 700 كم …أنا فعليا العربية معلمتش 350 كم معايا لأني كنت مشغل التكييف على طول وبدوس بالعربية ….المشكلة الأكبر من الوقت اللازم للشحن اني لما رحت لقيت عربيات تيسلا كتير واقفة طابور علشان تشحن ! 
ده معناه إن لازم يكون عندك شاحن في بيتك ….علشان تشحن العربية في “4 ساعات” …لو معندكش الشاحن هتوصل العربية بالكبس العادي اللي بتشحن فيه موبيلك علشان العربية تتشحن في 12 ساعة ! تخيل نفسك بتشحن العربية في كراج بيتكم ويجي ابن الجيران الرخم يشلك الكُبس …أو البواب يتكعبل فيه يفصله ! هتصحى تاني يوم يا معلم من غير كهرباء وهتركب تاكسي !! طبعا احنا بنتلكم عن أحسن وأغلى عربية كهربائية في العالم …اما بقى لو عربية نيسان ليف ….فالعربية مش هتمشيك 300 كم لو انت محترم في سواقتك …وبتاع 200 كم لو انت بتدوس وبتشغل التكييف والكاسيت والذي منوا ….يعني لازم يكون عندك “خطة” وفهم لطريقة تشغيل عربيتك ….مع العلم بأني هقسم العربيات الكهربائية لنوعين …النوع الأول هو “تيسلا” وده “مُمكن” تعيش بيه وتسافر لو انت ناصح وبتحسب كويس …والنوع الثاني هو “باقي” العربيات الكهربائية اللي أخرها 300 كم ….دي الغلطة بيها بفورة ….الغلطة بيها في بلد زي مصر هتوقفك على الطريق الصحراوي مستني ونش يجي يشيلك ! فالنوع الثاني ده ممكن تجيبه لو هتستخدم العربية كـ city car ….تستخدمها جوة البلد “بس” ….

هل العربيات الكهربائية موفرة ؟!

“طبعا” …تخيل عربية مبتخدش بنزين ولا زيت ولا فلاتر ولا سيور ومفيش فتيس باسطوانة ودسك وبلية …ده كمان التيل بيعيش في العربيات دي بـ 100 ألف كم ! لأن العربيات دي فيها نظام بيحول الطاقة الحرارية المتكونة من عملية الكبح لطاقة كهربائية …النظام ده بيخف الحمل على الفرامل بشكل كبير وفعال جدا جدا ! 
على المدى البعيد بس …بعد 10 سنين “مثلا” من استخدام العربية “ممكن” تحتاج تغير بطارية …بس أعتقد إن الموضوع هيبقى “أرخص” من تغيير موتور الإحتراق الداخلي “الكلام ده مُمكن جدا كمان 10 سنين” ….كمان تكلفة “شحن” العربية هتبقى “أكيد” أقل من تكلفة البنزين أو الديزل …ده في عربيات زي تيسلا هتشحنها “ببلاش” لو انت عايش في بلد فيها محطات شحن بتاعة تيسلا …مع العلم بان الشركة بتقول إن العملاء الجدد “مُمكن” تدفع فلوس علشان تشحن عربياتها !

طيب طالما العربيات دي موفرة …وأنا هستخدم العربية جوة البلد ….إيه المشكلة ؟!

المشكلة ببساطة إن العربيات دي تعتبر “جديدة” …تكفلة تصنيعها لسة عالية …فسعر العربيات مش رخيص …أو مش عادي ….يعني عربية زي نيسان ليف من الجيل الثاني موديل 2018 ماشية حاجة بسيطة في أمريكا تعملها حوالين الـ 30 ألف دولار أمريكي “حوالي 540 ألف جنيه مصري” ….الجيل الاول أرخص بكتير ….ممكن عربية موديل 2014 تعمل مابين 10 ألاف و 12 ألف دولار أمريكي يعني مابين 180 ألف و 216 ألف جنيه مصري …بس الفرق مابين الجيل زي الفرق مابين “السما” و “العما” …بي إم دابليو i3 اللي بتيجي بـ range extender “اللي هو موتور 3 سلندر صغير بيشتغل كمولد كهربا” دي هتعمل بردوا حوالين الـ 32 ألف دولار أمريكي لو موديل 2017 …موديل 2016 والموديلات الأقدم هتعمل حوالي 20 ألف دولار أمريكي وانت طالع …يعني المتوسط هو 400 ألف جنيه علشان تجيب عربية كهربائية “مستعملة” ….مش جديدة …..عربية جديدة هيكون سعرها أكيد فوق النص مليون ….الـ i3 التوكيل هيبيعها بقرابة “المليون” على حد علمي …تيسلا موديل إس من 2 مليون وانت طالع …يعني العربيات دي “غالية” في العموم ….لسة مبقتش عربيات “أقتصادية” الإستخدام ….