ازاى تحافظ على الموتوسيكل او الاسكوتر
كتب: علي عبده
زي ما ناس كتير شايفين ان الدراجات النارية بقت في كل حته، فيه اللي بيركب موتوسيكل للمتعة وفي اللي بيركب سكوتر عشان يقضي مشاويرة بعيدا عن الزحمة وتضيع الوقت وفيه اللي بيجمع بين الاتنين.. عشان تستمع بسواقة الموتوسيكل او الاسكوتر بتاعك لازم تحافظ علي الصيانة صح عشان متعملش اشتراك عند الميكانيكي او كل ما تطلع مشوار ترجع زقه او حد جرك.
الحمد لله رغم اني سافرت بالموتوسيكل الاف الكيلو مترات وعملت ارقام قياسية عالمية في المجال ده الا اني لم اواجه في مرة مشكله حقيقة في الموتوسيكل بتاعي علي الطريق وده بعد فضل ربنا يرجع الى الصيانة الصح علي العكس الواحد بيشوف ناس بتمشي مسافات قليله كل فترة وعندها مشاكل كثيرة وتصادفها اعطال كل مرة تقريبا. عشان كده حنقول ازاي تعمل صيانه صح و تحافظ علي الموتوسيكل بتاعك سليم.
دليل المستخدم
اول حاجة عشان تعمل صيانة صح وتحافظ علي الموتوسيكل بتاعك متسمعش كلام ٩٩٪ من الميكانيكية عشان معلوماتهم مبنية علي خبرة غير سليمة او كلام غير صحيح او فتاوي، عشان يبقي عندك المعلومة الصح لازم تجيب دليل المستخدم بتاع الموتوسيكل عشان تاخد منه المعلومة اللي المصنع جاب مهندسين وعلماء عشان يكتبوها.
عشان تجيب المنيول بتاع موتسيكلك لو مش معاك حتعمل بحث علي جوجل عن service manual الماركه + الموديل وسنة الصنع مثلا 2005 Yamaha fjr1300 service manualالمنيول ده بيدك معلومات عن كل حاجة تتخيلها عن الموتوسيكل بتاعك زي نوع الزيت وكميته ومقاس البوجيهات ضغط الكاوتش وحاجات تانية كتير.
دليل الصيانة
وده بيوضح لك كل جزء في الموتوسيكل بيتفك ازاي بمفتاح رقم كام وعلي عزم قد ايه، الحقيقة ده سبب ان معظم عمرات الموتوسيكلات بتفشل بجانب عدم استخدام قطع غيار اصلية يعني مثلا الدليل ده بيشرح لك ازاي تعمل عمرة مثلا وعزم ربط كل مسمار كام وبصراحة ميكانيكة قليل جدا اللي شوفت عندهم مفاتيح عزم غير كده كل ميكانيكي بيربط علي حسب احساسه وخبرتة اللي طبعا في الغالب بتكون تأثيرها سلبي، عشان تجيب دليل الصيانة بتاع موتسيكلك حتعمل بحث علي جوجل بكلمة) + workshop manual ماركة + الموديل وسنة الصنع) مثلا 2005 Yamaha fjr1300 workshop manual .
اختيار الزيت
خلينا نتفق علي حاجة أي زيت ينزل نضيف مش اسود فهو زيت سيء ومش بيقوم بوظيفته انه ينضف المحرك من فضلات الاحتراق، أي زيت كويس لازم يسود مع الوقت.
غلط اننا نحط زيت عربيات في الموتوسيكل عشان زيت العربية معمول للمحرك الفتيس بتاعه منفصل لكن الموتوسيكل المحرك والفتيس مع بعض طبعا لو الموتوسيكل بتاعك الفتيس منفصل تقدر تستخدم زيت عربية حسب دليل المستخدم، كمان في مواتير تبريد هواء زي الهارلي ديڨيدسون ودي ليها زيت مخصوص يقدر يستحمل الحرارة العالية . ازاي تعرف الزيت المناسب ليك ؟
عن نفسي بستخدم زيت ولف حتدخل علي الرابط ده
https://www.wolflubes.com/EN_EU/apps/FindLubricantIframe.aspx و تختار Advanced Search
وبعد كده نوع المركبة وتحدد الماركة والموديل وسنة الصنع وحيعرض لك كل السوائل المناسبة للموتوسيكل بتاعك زيت مياة تبريد زيت فرامل زيت مساعدين والكمية المناسبة ليه.. وطبيعي ان يكون النتيجة زي الي مكتوب في دليل المستخدم ومتستخدمش حاجه غيره الي ظهرت لك .
البوجيهات
ناس كتير بتتعامل مع البوجيهات غلط بحيث ان لو البوجية السن بتاعه ركب يبقي خلاص وده طبعا مضر جدا للموتوسيكل . البوجية ليها أوجه كتير زي المعامل الحراري وطول السن والجاب وحاجات كتير وأي تغير في النسب دي بيعمل مشكله علي المدي الطويل، كمان من خلال البوجية تقد تعرف حاله الموتور ايه واذا كان كويس ولا محتاج يتظبط.
عشان تختار البوجية المناسب ليك خش علي الرابط ده
http://accessngk.com/part_finder/Motorcycle/
اختار نوع الموتوسيكل بتاعك وموديله وسنة الصنع من الحاجات المهة انك قبل ما تركب بوجية لازم تظبط الجاب اوالمسافة بين السنة بتاعت البوجية وده بيكون رقم مكتوب علي علبه البوجية او في المنيول ودي مهمة جدا وبتفرق كتير في الحرق، في الغالب بتكون مظبوط بس لازم تراجع عليها كويس حسب الرقم المكتوب في المنيول.
ضبط الجنزير
من الحاجات المهمة الي ناس كتير بتعملها غلط وتقيس الجنزير بايدها وخلاص، حتلاقي علي المقص من الناحية الشمال في رقم مكتوب لشده الجنزير وحتلاقيها في المنيول كمان ودي بتتقاس بمسطره وليها نسبة مش بأيدك خالص الا لو عندك خبره عالية وعارف الموتوسيكل بتاعك كويس.
كمان لازم تحافظ علي الجنزير بتاعك متشحم صح باستخدام خامات صح يعني ولا زيت ولا شحم لازم اسبراي بتاع جنزير عشان ميلمش تراب و يبوظ طقم الجر.
ضغط الكاوتش
معظم الناس بتظبط الكاوتش علي ٣٠ وخلاص و ده شيء مش صح. كل مركبه و ليها ضغط إطارات مختلف حسب وزنها وقطر الاطار وحاجات كتير، مقاس الكاوتش المظبوط حتلاقيه علي استيكر ملزوق جنب العجله الخلفيه او في دليل المستخدم، ظبط الكاوتش صح حيوفر لك بنزين حيديك فرامل افضل و ثبات احسن ويحافظ علي عمر الإطارات
من المهم كمان ان يكون معاك عده خفيفه في الموتوسيكل والاسكوتر بتاعك عشان تقدر تتعامل لوحصل معاك اي مشكلة في الطريق زي بوجيه احتياطي ومفتاح بوجيهات مفك صليبه ومفك عاده وبنزه ولازق وشرايط رباط وكام مفتاح
