وأنت رايح تشترى عربية مستعملة من سوق السيارات المستعملة أو من على الانترنت بتشوف مصطلحات وحاجات عجيبة خد بالك منها والكلام ده كتير وفيه ابداعات كتيرة تجدها منتشرة فى سوق المستعمل ولدى التجار المتخصصين فى تلك السيارات
1- جُملة “مرفوعة عشر سنوات” تعرف إنها عربية إستيراد وإستعمال الخارج .. ما حدش بيشترى عربية علشان – لامؤاخذة – يرفعها
2- لدواعى السفر … مصر كلها بتبيع عشان مسافرة
3- كاوتش جديد وبطارية جديدة : وتشتريهم جداد ليه لما إنت ناوى تبيع ؟؟ ولا علشان صعب حد يثبت إنهم مُستعملين .
4- ربنا يبارك للى حيآخدها , جملة معناها الأصلى ربنا يبارك له علشان هايريحنا منها :
5- راشة نضافة : معناها العربية عملت عُشرميت حادثة وإتردت على الساخن والبارد بس إحنا مش عايزين نقول كده
6- فابريكة دواخل : يعنى غيرنا فيها كل حاجة بسبب حوادث وعايزين نلبسهالك بنفس سعر الجديدة
7- موتور 70% : يعنى محتاج طقم شنبر وملصمين العربية بالعافية وهاتطلع دخان أزرق بعد ما تمشى عشرين كيلو من عندنا
8- التكييف محتاج شحن فقط : يعنى كومبريسور بايظ وسربنتينة محتاجة تغيير بس إحنا بننصب عليك وإنت هاتشرب المقلب لحد آخره … شحن التكييف 250 جنيه عند أى حد … ماتعمله بنفسك قبل ما تبيع !!
9- لسة معمول لها عمرة من أسبوع : يعنى العربية حاولنا نصلحها وحالتها ميئوس منها بس إحنا عايزين نلبسهالك
10- يُرجى إحضار فنى للمعاينة وعدم ضياع الوقت : يعنى أنا مش عايزك تعمل فيها ناصح وتحاول تكتشف البلاوى إللي فى العربية بنفسك . هات ميكانيكى وإحنا هانديله إللى فيه النصيب ويقول عليها كويسة
11- فرش صالون جديد : يعنى مداريين أثر السجاير والبلاوى التانية إللى عملناها فى العربية زمان
12- إستعمال واحدة ست : والستات أكتر ناس بتلبس نُقر ومطبات وبتحك فى أى حاجة ماشية جنبها وبتعمل حوادث وما تعرفش يعنى إيه صيانة
13- العداد شرعى : لُغة التجار الفلاحين وش
14- العربية فيها ٣ ورقات : يعنى ما تخافش كل واحد فينا زود على تمنها 9000 جنيه بس
15- فيه نُقرة بس للأمانة عند الرفرف الخلفى : العربية مليانة بارومة من كل ناحية وإحنا بس عايزين نبين عندنا شوية أمانة … أهم حاجة الأمانة … مش كدة
16- كاملة ماعدا الفتحة والجنط : يعنى أول فئة
17- فيميه مثبوت على الرخصة .. يعنى العربية زجاج خلفى مُلون بس إحنا ضاربين إسود أغمق حاجة وهاتتمسك عند كل كمين بعدها
18- السعر : إنبوكس … كالعادة
