أحمد عمار يكتب : صفر الجمارك …وأسعار العربيات الأوروبية !

1- لما تشتري عربية جديدة ….متسألش بياع الشركة في رأيه في عربيته ….لأنه ببساطة هيشكر فيها للصبح ….نفس الفكرة في السؤال عن سعر العربيات هينزل ولا لأ …متسألش مسئول كبير في شركة عربيات السؤال ده ….افتكر أم العروسة على طول ! المسؤولين في الشركات مصلحتهم في ايصال فكرة إن الأسعار مش هتنزل علشان ميعطلوش في البيع بالربع الرابع الاخير من السنة قبل شهر يناير…..وده من حقهم !! كل واحد حر في عربياته وحر في أسعار…وحر كمان في تصريحاته ..في النهاية ده سوق مفتوح وممكن شركة ولا شركتين يقلبوا الدنيا لو نزلوا اسعارهم ويجروا الباقي للتنزيل …
2- فكرة إن الجمارك نزلت على العربيات الأوروبية طوال السنين اللي فاتت وان الأسعار “مفرقتش” دي فكرة خاطئة تماما !! افتكروا إن في عربيات أوروبي بتيجي بسعر أقل من المنافسين الكوريين ضمن نفس الفئة بفرق يصل إلى 100 ألف جنيه مصري !! افتكروا عربيات زي أوبل أسترا اللي بتتقدم بسعر 329 ألف جنيه مصري بس !
3- توكيلات العربيات في مصر بتكسب كويس من بيع عربياتها …هامش الربح كبير …وده حقهم بشكل أو بأخر …لأننا في سوق مفتوح …كل واحد من حقه يُحط السعر اللي يعجبه قصاد الاستثمارات اللي بيحطها في السوق من مراكز صيانة وشراء قطع غيار…الدور عليك انت …متشتريش عربية تحس إن سعرها أكبر من قيمتها ..
4- الدليل إن الشركات بتكسب كويس أوي هو التخفيضات والعروض اللي بتققدم من الحين والأخر بأسعار تتراوح من 10 إلى 30 ألف جنيه مصري على حسب سعر العربية …وافتكروا كمان إن تجار العربيات الخليجي بيقدموا عروض أعلى تجهيزا وبأسعار في الغالب “أفضل” من بعض الوكلاء ….. التجار دول بيكسبوا كويس ….بعد من الوكيل في البلد الخليجي يكسب هو كمان !! يعني هامش الربح مش بطال خالص ….
5- ظاهرة الخليجي بدأت في الانحسار السنين اللي فاتت لأن ظاهرة “الأوفر برايس” بقت حل أفضل للمكسب السريع الكبير ..وده بالتنسيق مع الوكيل وبدون وجع دماغ الاستيراد من الخليج ومنافسة الوكيل الرسمي ….العميل و تريح الدماغ هو السبب ان الظاهرة دي تتوحش !
6- الجمارك لو فرقت 10% على العربيات الاوروبي اللي بتيجي بمحركات من 1600 سي سي وانت نازل …ده هيعمل فرق كويس أوي في العربيات الغالية …تخيل عربية مرسيدس سعرها مثلا مثلا 40 ألف يورو …الـ 10% دي يعني 4000 يورو …يعني أكتر من 80 ألف جنيه ….لو عربية رخيصة الموضوع هيبقى أقل من كدة بس بردوا احنا بنتكلم في 40 ألف جنيه مثلا …وده بردوا رقم مش بطال بردوا ….مع العلم بأن الأرقام أكبر من كدة والفروقات أعلى من كدة !
7- الدولار الجمركي اللي ناس كتير بتتكلم إنوا “بع بع” ويقدر ياكل فرق الجمارك …..ده بيدفع على “الجمرك” بس ….مش هيأثر في ثمن العربية الأصلي …يعني العربية المرسيدس اللي مثلا سعرها 40 ألف يورو …لو إدفع عليها “مثلا” 50% زيادة مابين جمارك وضريبة مبيعات و والكلام ده …هيبقى عليها 20 ألف يورو ….لو الدولار الجمركي زاد “جنيه” وده فرق مش صغير …يعني الفرق هيكون 20 ألف جنيه …يعني بردوا سعر العربية هينزل بتاع 60 ألف جنيه ….وهكذا …
8- لو الناس اقتنعت بفكرة ان البلد دي مفهاش حاجة بترخص …يبقى الأسعار فعلا مش هترخص !! بعض الشركات هتقلل من المعروض من عربياتها …وده هيخلق فرصة لتوحش ظاهرة “الأوفر برايس” ….لو الناس موقفتش وقفة صح …الأسعار هتزيد وهيبقى المستهلك هو السبب الرئيسي في الموضوع ده …
9- لو الوكلاء ضربوا فرق الجمارك في جيبهم …. هيبقى في فرصة للمستوردين والتجار انهم يستوردوا العربيات لحسابهم …وطبعا مش هيرخصوا من ثمنها علشان يكسبوا ….ساعتها الأفراد ممكن يستوردوا عربياتهم بنفسهم ….يوفروا فرق الجمارك وفرق الاوفر برايس …طبعا الحركة مش هيبقى ليها لازمة لو في عربية سعرها “عادي” …اما هتبقى مفيدة لو في عربية غالية تستاهل …
10- الحركة التسويقية الصايعة اللي عملتها شركات زي المنصور وغبور اللي بتعد برد فلوس فرق الجمرك للعملاء هي فكرة عبقرية !! الناس دي عاوزة تبيع عربياتها قبل ما المنافسة متشتعل !! تخيلوا لو شركة ولا شركتين يلعبوا بصياعة واحترام وقرروا أول السنة ينزلوا اسعار عربياتهم علشان يكسبوا أرضية !! ليه نخش في الفيلم ده !! بيع يا معلم قبل ما السوق يولع !