الرحالة المصرى على عبده يدخل موسوعة جينيس “أطول رحله علي موتوسيكل”
نجح الرحالة والمغامر المصري علي عبده، مؤسس مبادرة «حول مصر على موتوسيكل»، في كسر الرقم القياسي العالمي المسجل في موسوعة «جينيس» للأرقام القياسية، بمسافة تزيد 48 كيلومتر، عن الرقم المسجل في إنجلترا من قبل.
واستطاع عبده تحطيم الرقم العالمي في مدينة الجونة على حلبة نادي «موتو كولب» بعد قيادة دراجة «موتوكروس» لمدة 24 ساعة، وقطع مسافة 613.59 كم، في 510 جولات.. ويهدف الرحالة من تسجيل ذلك الرقم القياسي إلى جذب الانتباه العالمي لسياحة السفاري والمغامرات في مصر، ودعم وتطوير السياحة المصرية من خلال مبادرته «حول مصر على موتوسيكل».
كما يعمل الرحالة والمغامر المصري علي عبده، على إنشاء موسوعة إلكترونية متطورة تضم خلال تلك الرحلة جميع محافظات مصر؛ لتوثيق كافة المعالم والأنشطة في تلك الأماكن، بهدف استكمال موسوعته الإلكترونية، التي يسعى من خلالها إلى دعم وتطوير السياحة في مصر، وتوفير كافة المعلومات التي من شأنها تسهيل وزيادة حركة السياحة.
وقد حقق البطل المصرى على عبده الرقم القياسى ليدخل موسوعة جينيس “أطول رحله علي موتوسيكل في ٧ أيام ٥٨٦٤ كم” لفيت فيهم معظم مصر وتم تسجيله في عدة موسوعات عالمية، 
قال الرحالة المصرى على عبده :” بدأت افكر ازاي اطور مبادرة حول مصر علي موتوسيكل و اديها بعد عالمي عشان هدفي ان الناس بره تعرف عن مصر اكتر، فكرت في ايه الأرقام القياسية الي ممكن تتعمل في مصر في حدود امكانياتي وتضيف حاجه للناس ولقيت عدد من الأرقام القياسية الي اقدر اعملها وعملت ليهم خطه للتنفيذ.. في ٧/ ٢٠١٦ قدمت علي الرقم القياسي “أطول مسافه قياده دراجه موتوكروس في ٢٤ ساعه” الرقم ده متسجل في إنجلترا عام ٢٠١٣ و حتي كسري ليه محدش كان حاول حتي يكسره عشان الموضوع فعلا صعب، الموتوكروس ده نوع من سباق الموتوسيكلات في حلبه اوفرود مش اسفلت حاجه كده شبه الرالي مثلا بس جوه حلبه مغلقه فيها زي حواجز و عوائق و ملفات قويه المفروض تتجاوزها بسرعه. بعد ٣ اشهر في أكتوبر ٢٠١٧ استلمت الموافقة علي تنفيذ الرقم القياسي و بدآت ادرس الشروط المطلوبة لتنفيذ الرقم ده و اشوف ايه الاماكن المتاحة و ازاي حنعمله، بعد حوالي شهرين من الدراسة لقيت ان مفيش غير تراك واحد في مصر اسمه موتوكلوب موجود في الجونة محافظه البحر الأحمر، تواصلت مع شيكو صاحب موتوكلوب و عرضت عليه الفكره و رحب بيها جدا و ابدي استعداده انه يقدم كل شيء عشان نعمل الإنجاز ده في مصر. و بدأت اني اسفر الجونة كذا مره عشان ادرس التراك و الظروف المحيطة و نعمل إحصائيات لمتوسط السرعة و استهلاك الوقود و عوامل تانيه كتير عشان نقدر نعمل خطه علميه للتنفيذ. الجميل ان كان في ناس كتير من الغردقة و القاهرة بتيجي تساعد في التدريب و الدارسات دي و قدمو مساعدات كتير قوي كانت السبب الأساسي في نجاح الموضوع ده. اول ميعاد تم تحديده عشان نكسر الرقم كان ١٠ مارس ٢٠١٧ بس للأسف نظرا لان الموضوع قائم علي المجهودات الفردية و تعاون الناس و تكلفه الموضوع الكبيرة اجلنا الموضوع لحد ما نكمل قطع الغيار و المعدات المطلوبة لتنفيذ الرقم لحد شهر ٦ و تم تحديد يوم ٢٩ و ٣٠- ٦ عشان نعمل الرقم ده. بجانب التخطيط و الاعدادات الفنية كان في اعدادات بدنيه و طبيه لازم اعملها عشان أكون جاهز اني اتحمل مجهود بدني متواصل بالشكل ده، كان لازم اعمل شويه فحوصات طبيه و اعالج بعض المشاكل البسيطة، كان لازم اخس عشان يكون وزني مناسب علي موتوسيكل الموتوكروس الي بيكون في الغالب ٢٥٠ سي سي و خسيت ٢٥ كيلو غير ان كان لازم اروح الجيم ٥ أيام في الأسبوع لتقويه بعض العضلات و رفع الكفاءة البدنية ، الحقيقه الجزء ده كان صعب مع الشغل بتاعي و البيت و الولاد و حاجات تانيه كتير بس الحمد لله قدرت اني اعمله. التنفيذ وصلت الجونه قبل تنفيذ الرقم بيوم عشان اقدر اخد راحه مناسبه قبل الرقم و اتابع التجهيزات و كان في حاجات كتير لسه مخلصتش زي الموتوسيكل نفسه الي حلعب بيه بس احد أصدقائي من المحترفين في اللعبه دي اسمه احمد زقزق خلص الموتوسيكل قبلها بكام ساعه و الموتوسيكل الحقيقة كنت مستلفه من واحد صحبي اسمه مهند في الغردقه عشان اعمل بيه الرقم القياسي الموتوسيكل كان راكب فيه كاوتش صيني و طقم جر صيني و حاجات تانيه مش اصليه عشان نخفض التكاليف علي قدر الإمكان. المفروض كنا نبداء الساعه ٨ الصبح و التيم بداء يتجمع من الساعه ٧ حسب الاتفاق بس الدكتور بتاعي اتاخر و ده ادي اننا نبداء الساعه ١٠:٥٥ الصبح، الطقس كان سئ جدا سرعه الريح تقريبا ٣٥ عقده و ده خلي ان في يفط كتير في التراك تتقطع او تطير و الحرارة كانت ٤٢ تقريبا و كان في مناقشات اننا ناجل ليوم الطقس فيه افضل، مكنش عندي رفاهيه اني ااجل ليوم تاني اليوم ده انا و ناس كتير اشتغلنا كتير و تعبنا عشان نوصل له و مكنش في قدامي غير اني ابداء سواقه، البدايه كان كويسه بس الهواء كان تاعبني جدا و مع السواقه في التراك و اثر الكاوتش في الأرض و سرعه الريح بداء الرمل يتجمع في الملفات او بشكل أوضح في الاماكن الي بعدي منها اكتر و ده خلي الموضوع صعب جدا عشان لو حاولت ابعد عن الرمل الهواء بيزقني علي الرمل و لو دخلت الرمل في احتمال كبير اني اقع و لو وقعت بنسبه كبيره حيكون صعب اكمل مكنش قدامي الا اني امشي بسرعه متوسطة، الهواء مع الوقت كشف الحصو و الحجارة الي في الأرض و ده ادي ان فرده الكاوتش الامامي تضرب مني و الحمد لله اتغيرت في اقل من نص ساعه و تاني يوم الفجر الفرده التانيه ضربت و دي اخدت اكتر من ساعه عشان و احنا بنركب الاحتياطي اتقطعت و حد خرج بره يجيب فرده تانيه “مكنش معنا غير فرده واحده احتياطي ” غير الحراره العاليه الي خلتني كل ساعه تقريبا لازم اقف اشرب سوايل كتير و اغرق نفسي مياه عشان استحمل الحراره و بعد شويه قلعت التيشيرت الي كنت لبسه و فضل بدرع الحمايه بس عشان الحر و اني اغير الخوذه الي لابسها. الخطه الي كنت عاملها المفروض اني كنت انفذ فيها ٧٠٠ كم علي الأقل بس ظروف الجو و زياده مرات التوقف للمياه و فردتين الكاوتش ضيعو مننا وقت كتير الصراحه بس قدرت بعد حوالي ٢٢ ساعه اني اكسر ال ٥٦٦ كم بكيلو واحد زياده و عملت في الوقت الي فاضل حوالي ٣٥ كم فوق الرقم. اكتر حد تعب في الموضوع ده الفريق الي كان شغال معاي ناس شغال توثيق طبعا لشروط موسوعه جينيس و ناس عشان البنزين و الموتوسيكل و ناس بتجيب لي مياه و اكل و ناس بتروح ترجع ناس للغردقه و تجيب ناس تانيه تكمل مكانهم، الحقيقه الفريق هو السبب الأساسي في نجاح المحاوله دي و اني اكسر الرقم القياسي، أوقات كتير من التعب مش قادر اكمل بس كل ما افتكر تعبهم و واقفهم الفتره دي كلها اقرر اني مضيعش تعبهم علي الأرض . بالنسبه لموضوع الرقم القياسي و تسيجله في جينيس زي ما وضحت ان بيطلب مجموعه كبيره من الواِثائق و بيتم ارسالها لجينيس لاعتماد الرقم القياسي و نشره و دي عمليه بتحتاج حوالي ١٢ أسبوع تقريبا باقصي حد المرحله الجايه عندي رقمين اتمني اني اقدر اعملهم １- أطول مسافه قياده موتوسيكل في ٢٤ ساعه و دي عايز اسجل فيها ٤٠٠٠ كم عشان اكسر الرقم الأمريكي ٣٤٠٠ كم و ده بالنسبه لي تحدي شخصي اتمني احققه ２- أطول رحله علي اسكوتر ٥٠ سي سي و دي ١٥ الف كم و دي هدفي فيها اني اغطي كل منطقه في مصر من حيث الأنشطة و الاماكن الاثريه و أي حته تستحق الزيارة و حيتم توثيقها و ترجمتها و تصوريها بشكل محترف عشان نوري الناس جوه مصر و بره مصر صوره من ارض الواقع مختلفة عن الي يعرفوه عنها بس المشكله انا صعب تلاقي حد بيمول الانشطه دي في مصر غير ان تكلفتها عاليه و بتحتاج وقت طول لتفيذها.
