قصة المغامر المصرى على عبده مع الاسكوتر

اول مرة لفيت فيها مصر علي موتوسيكل عملت تقريبا ٥٥٠٠ كم في ١٥ يوم عشان اقول للناس ان مصر فيها اماكن كتير جميله ميعرفوش عنها كتير.. تاني مره عملت رقم قياسي عالمي اسمة اطول رحله موتوسيكل في ٧ ايام و عملت ٦٠٠٠ كم تقريبا اتسجل في ٤ موسوعات عالمية عشان اقول للناس بره انك تقدر تروح اي حته في مصر حتي لو علي موتوسيكل.. هكذا يحكى لنا المغامر المصرى على عبده قصته مع الاسكوتر

. خلال الرحلتين دول كنت بزور المدن الهمه المعروفة لناس كتير و بتكلم عن اماكن ناس تعرفها و ناس متعرفهاش.

عشان كده قررت اعمل حاجه مختلفة شويه تغطي مصر بالكامل، الرحلة الجايه ان شاء الله حاجه كده مجنونه شويتين تلاته اربعه 🙂
الرحلة دي عباره عن رقم قياسي اسمه اطول رحله في العالم علي اسكوتر ٥٠ سي سي “زي الي في الصورة كده” الآسكوتر ده سرعته القصوي ٦٠ كم/ساعة بطه بلدي يعني 🙂 الرقم ده مسجل في روسيا عام ٢٠١٣ و كان حوالي ١٤٣٠٠ كم .

– طيب ليه البهدله دي و الفائدة منها ايه ؟
بص يا سيدي انا بشتغل مهندس نظم معلومات و سهل بالنسبة لي اني اوصل لاي معلومة عن مكان عدا مصر و كنت بواجه مشاكل كتير لما اجي اخطط لاي رحلة، في اماكن كتير في مصر مفيش عنها معلومات واضحه او حديثه كل الموضوع عباره عن تجارب لأشخاص بتشوفها في الفيسبوك او في منتديات و بتضييع مع الوقت و غير منظمه عشان كده قررت اني اعمل موسوعة الكترونيه عن مصر و اكمل المعلومات الي عندي خلال الرحلة دي و اطرحها في منصة الكترونية للناس عشان تشارك فيها و تضيف و تعدل معلومات حسب تجاربهم و خبراتهم.

– طيب ايه الفائدة من الموسوعة دي
باختصار كلنا بنشوف ناس بتسال انا رايح إسكندرية ولا اسوان اعمل ايه و اروح فين و الردود بتكون عباره عن تجارب كل شخص بيرد و تختلف الآراء و الموضوع بيختفي و نشوف بوست تاني زيه بعد شويه و هكذا، طيب احنا لو عملنا حاجه بتضم المعلومات دي كلها الي حيروح اي مكان في البلد حيبقي عنده معلومات كامله عنه من خلال برنامج موبيل زي ( الاماكن الأثرية – امكان الترفيه – أماكن التنزه – محطات البنزين – ورش الصيانة – الخ) كمان اقتراحات لبرامج زياره بناء علي تجارب ناس تانيه، كل ما الفرد يعرف اكتر عن المكان الموجود فيه حيساعده انه يتحرك اكتر و ده اكيد حيفيد الناس الي في المكان ده من الناحية الاقتصادية و حيخلي تجربه الشخص ده افضل و حيسهل لناس كتير الحركة و السياحة الداخلية ، كمان الموسوعة دي حتترجم لكذا لغة عشان نساعد الأجانب انهم يعرفو اكتر عن الاماكن في مصر و ده حيساعد علي زياده حركه السياحة و حاجات تانية كتير قوي.

كمان ممكن نتكلم عن فرص استثمار او التطوير في أماكن كتير في مصر زي “مثلا” طريق سفر مفهوش بنزينه او محطه خدمه فممكن لو اتكلمنا عن المشكلة دي حد يهتم و يعمل النشاط ده و في اخر الرحله حنطلع تقرير بالخدمات الي الاماكن المختلفة محتاجه و نبعتها لشركات مختلفة ممكن تكون مهتمة انها تستثمر في النشاط ده.
و كمان حنتكلم عن التحذيرات بخصوص بعض الطرق او المناطق و التجارب السيئة.

– ليه طيب بتعملها في رقم قياسي ؟
باختصار الرقم القياسي حاجه العالم كله بيتكلم عليها و انا حابب ان العالم كله يتكلم عن التجربة دي في مصر عشان ليها ابعاد كتير منها تحسين الصورة الخارجية عن مصر و منها تشجيع الناس انها تزور مصر و حاجات تانيه كتير.

– خط سير الرحلة ؟
مسافه الرحله تقريبا ١٦٠٠٠ كم حنروح كل مكان في مصر
باختصار الرحلة دي حتغطي كل حته في مصر مدينه – قرية – نجع – و حتت حتي مفهاش ناس، الهدف من الرحلة اني اعمل توثيق لمصر بالكامل عشان كده لازم نروح كل حته بالتفصيل.
خلال الرحلة حيكون في انشطه مختلفة عشان ننقلها للناس مش مجرد سواقه و بس زي (غطس في أماكن الغطس الجميلة عشان وريها للناس – تسلق جبال في سينا – زياره المعابد في الأقصر و اسوان و المتاحف في القاهره و غيرها – زياره مطاعم مميزه- الخ ) باختصار هي رحله للتوثيق عشان كده لازم نغطي كل حاجه في مصر

طيب هي مصر كلها حاجات جميله؟
اكيد لا كل بلد في العالم فيه حاجات مش كويسه عشان كده حنتكلم برضو عن بعض الحاجات الي مش صح بس مش بغرض الشكوى لكن بغرض اقتراح حلول ليها او تسليط الضوء عليها عشان تتحل.

كلام جميل بس صعب تحقيقه صح ؟
الحقيقه هو اصعب مما حد ممكن يتخيل 🙂 و في تفاصيل ممكن تعمل منها رساله دكتوراه 🙂 بس الحمد لله اتعودت اني احقق احلامي و عندي ثقة في الله اني حعمل الرحلة زي ما عملت الي قبلها و اعمل الموسوعة الإلكترونية بالشكل الي بحلم بيه و تحقق الاهداف بتاعتها.

الموسوعه دي و الرحله حلم شغال عليه بقالي اكتر من ٣ سنين و ان شاء الله يتحقق بشكل محترم