مواجهة موسيقية بين “شارموفرز” و”مسار إجباري” في ريد بُل ساوند كلاش
في ٢٠١٣ انطلقت أول ريد بُل ساوند كلاش في مصر بمواجهة موسيقية بين فريقين على مسرحين مواجهين لبعض، حلبة ملاكمة عملاقة والحكم هو الجمهور الواقف بين المسرحين، وبصوته وتشجيعه لكل فريق يتم حسم جولات المنافسة. المواجهة الأولى كانت بين فرقتين وسط البلد وكايروكي، والثانية كانت في ٢٠١٥ بين كايروكي وشارموفرز. الكلاش الثالث هيكون يوم الجمعة ٢٤ فبراير بين شارموفرز اللى بيشاركوا للمرة الثانية، ومسار إجباري المشاركين للمرة الأولى وذلك على مسرح يقام خصيصًا بجوار داندي مول بطريق القاهرة/الإسكندرية الصحراوي
أول ظهور لمسار إجباري في ساوند كلاش هيحصل بعد طول انتظار من محبيهم، الفريق السكندري صاحب الباع الطويل في موسيقى الروك والجاز وصوت هاني الدقاق المميز هيدخل تحدي جديد، ومستعد بأقوى أسلحته المتمثلة بجمهوره العريض، وأغنيات لها أثر عميق في نفوس محبيه زي: حاوي، مرسال لحبيبتي وشيروفوبيا.
حفلات ريد بُل ساوند كلاش مختلفة عن أي حفلة تانية، والمزيكا اللي بتسمعها هناك عمرك ما هتسمعها في أي مكان تاني، لأن كل فريق بيقدم أغنيات الفريق التاني بطريقته الخاصة، وبيلعب أغنياته نفسها بتوزيع مختلف عن المعتاد، وأخيرًا بيقوموا بدعوة واحد من النجوم الكبار يغني معاهم على المسرح، ويبقى الكارت الكسبان اللي يحسم بيه آخر جولة.
مستر شارموفر العظيم هيقف قدام جمهور ساوند كلاش للمرة التانية، يا ترى خبرته هتساعده علشان يحسم الكلاش؟ ولا “مسار..يا دَولة” هيسحبوا البساط ويسيطروا على مصنع المزيكا؟
