بما إن الصيف داخل علينا والجـو هـيبقى حـر بشكل لا يطاق .. هنقولك على حاجات تاخد بالك منها لما تروح للميكانيكى أو التوكيل عشان تضمن إن تكييف عربيتك يكون شغال بشكل كويس
1) لو عربيتك موديل قديم قبل سنة 1994 غالبآ بيكون نوع الفريون اللى فيها R12.. فأنت هتغيره وتستخدم فريون 134a
2) هتغير فلتر الهوا بتاع التكييف لأنه متغيرش طول فترة الشتا.
3) إتاكد إن مفيش مشكلة فى تسريب الفريون لأنك المفروض حتى فى الشتا تشغل التكييف.
كل فترة لمدة بسيطة عشان الفريون بيكون فى زيت فابيحافظ على الــ (O-rings) الموجودة وغالبآ محدش بيعمل كدة فا لازم تتاكد إنها سليمة وإن مفيش تسريب فريون فى الدورة.
4) أفحص حالة الـ “Compressor Clutch & condenser” عشان تتأكد من الوصلات والضغوط.
5) أفحص الضفيرة وإتأكد إن كل الفيش راكبة كويس والكهربا واصله لحد الكمبريسور.
6) استخدم جهاز الشحن و إضغط الدوره و تابع العداد و اتاكد من عدم وجود اى تسريب.
7) بعد الخطوة رقم 6 أبدء أعمل Vacuum للدورة لمدة لا تقل عن 30 دقيقة.
8) إعادة شحن الدورة بالفريون مع الكمية المناسبة من الزيت و الصبغة.
(الهدف من الصبغة إنها بتظهر لون فسفورى تقدر تلاحظه بإستخدام نضارة معينة خاصة بالكشف عن تسريب الفريون)
9) أختبر كل الوصلات وأجزاء المنظومة بالنضارة وملاحظة وجود أى صبغة أو تسريب خارجى.
10) إتاكد من سلامة الــ Blower ووحدة المقاومه الخاصة بيه و مسارات خروج الهوا.
دورة التبريد
بعض الحاجات المهمة لازم تتأكد منها فى دورة تبريد الموتور قبل الصيف
1) Antifreeze coolant
أول حاجة وأهم حاجة السائل اللى أنت هتزوده فى دورة التبريد واللى بدوره هينقل درجة حرارة الموتور ويبددها فى الهوا خلال مروره فى المسارات والأجزاء اللى بيمشى فيها
عشان كدة أنت مينفعش تستخدم مياه من الحنفية لأن المياه دي كلها أملاح وهتسببلك تآكل فى الطلمبة والردياتير والموتور وبالتالى هتدفع فلوس كتير فى تغيير الأجزاء اللى إتاكلت بسبب المياه دي.
2) Thermostat
الثيرموثتات ده هو اللى بيتحكم فى مسار المياه سواء تدخل على الردياتير تتبرد ولا تاخد كمان لفة فى الموتور.
طبعآ لو فيه مشكلة هيفضل يخلى المياه تلف جوة الموتور لحد ما تغلى والموتور يسخن جدآ ..
طيب إزاى أعرف إنه سليم ؟!
– إنك تدور العربية وعند درجة حرارة من 80-85 تقريبآ على حسب العربية هتلاقى كوعة المياه السفلية إلي خارجة من الردياتير سخنة وده معناه إن الثيرموثتات فتح وسمح للمياه إنها تدخل على الردياتير تتبرد..
3) Water pump & hoses
لازم تتأكد من كفاءة طلمبة المياه والسير أو الـ”Drive belt” الخاص بيها إنه سليم
وإن مفيش أى تسريب فى أى خرطوم أو فى أى جزء أو الردياتير عن طريق مستوى المياه فى الـ “Over flow tank” أو قربة المياه.
4) Radiator
أفحص الردياتير وإتاكد إن مفيش تسريب وإتاكد إن الريش بتاعتها سليمة مش متطبقه (Radiator fins) لأنها هي اللي بتساعد على تبديد الحرارة للجو.
5) Radiator fan
المروحة لو مشتغلتش أو بتتأخر هتتسبب فى إرتفاع درجة حرارة الموتور والأسباب اللى ممكن تخلى المروحة متشتغلش ممكن تكون (ضفيرة – فيوز – ريلى – موتور المروحة نفسه – مقاومة).
6) Radiator cap
غطا الردياتير أو غطا القربة هو الهدف منه يحافظ على ضغط معين لدورة التبريد جوة الموتور من (0.9 – 1.1) على حسب كل موتور بيكون ليه ضغط والغطا ده هو اللي بيسمح للضغط الزيادة إنه يخرج للقربة أو يرجع تانى.
لو حصل بقي فيه مشكلة الضغط ده هيختلف وممكن يعملك مشكلة إنه يدخل هوا جوة الدورة ودي هتبقي مشكلة كبيرة تخلى الوتور يسخن.
