بقلم أحمد عمار: تشتري BMW متجمعة في مصر ….ولا مستوردة من ألمانيا ؟!
في أسطورة بتقول إن العربيات الـ BMW اللي بتيجي من ألمانيا أحسن من العربيات اللي بتتجمع في مصر ..وإن في فرق في “التقفيل” ….وفرق في الجودة …وكلام كتير مُمكن يبقى منطقي …الألمان مشهورين بجودتهم وبتفانيهم في العمل …المصريين مشهورين بالجودة المُمتزجة مع الفهلوة وودع “اللمسة المصرية الأصيلة”….ولكن الموضوع معقد ومش زي ما هو “ظاهر” …على الأقل في مصنع زي مصنع BMW ….إمبارح زرت مصنع البافارية في السيارات لتجميع سيارات بي إم دابليو في منطقة السادس من أكتوبر …وحاولت أجمع معلومات فعالة و “To the point” عن الموضوع ده !
أولا لازم نعرف إني إستخدمت مصطلح “تجميع” مش تصنيع لسبب مُحدد ….لأن في نوعين من “الشغل” في عميل انتاج السيارات في المصر …
1- الإنتاج بطريقة SKD ….وهي تجميع السيارة في المصنع بدون أعمال لحام على الهيكل ….يعني العربيات بتيجي كاشاسيهات كاملة …وبيتم بناء العربية عليها …تقريبا عملية اللحام الوحيدة بتكون عملية لحام “رقم الشاسيه” …وده اللي بيحصل في عربيات بي إم دابليو في مصر …
2- الإنتاج بطريقة CKD …ودي عملية انتاج السيارة بأعمال لحام …بيتم فيها تلحيم الشاسيه والقيام بأعمال أكثر تعقيدا في عملية الإنتاج …وده زي اللي بيحصل في مصنع AAV مثلا .. وتحديدا على عربيات جيب وتويوتا ….
ثانيا ….لازم نعرف إن في نسبة مُنتج محلي مصري لازم تدخل في عملية انتاج السيارة ..النسبة دي بتساوي 45% …ودي نسبة لازم بتتطبق في عملية انتاج السيارة في مصر سواء كانت SKD او CKD …في حالة عربيات بي إم دابليو الـ 45% دي بتيجي كـ 15% لاستخدام خطوط الانتاج والدهان ..وباقي نسبة الـ 45% تتمثل في الكراسي والشكمان وضفائر الكهرباء وفرش الأرضية وفرش الأبواب الداخلي …
طيب إذا المنتجات المحلية دي هي اللي هتأثر على “جودة” العربيات البي إم دابليو اللي بتتجمع في مصر ؟!
الإجابة بإختصار هي “لا” …لأن الشركة الام بتراقب عملية إنتاج كل طراز جديد بيتقدم في مصر …وبتبعت مراقبين لمراقبة عملية الإنتاج في بداية المشروع ….ولازم توافق على المنتجات المحلية المستخدمة قبل الموافقة على المشروع أساسا …يعني مثلا …الضفائر الكهربائية المُستخدمة في عربيات بي إم دابليو المصري بتيجي من شركة lEONI الألمانية اللي ليها مصنع في مصر …وبتصدر 90% من انتاجها للشركات العالمية في مصر …شركات محترمة زي جاكوار لاند روفر على سبيل المثال …الكراسي من موبيكا ….وبتيجي بنفس المواصفات الالمانية ….الشكمانات من شركة إسمها بويزن ..شركة عالمية فاتحة في مصر من 6 شهور تقريبا …وبتقدم منتجات بنفس الجودة العالمية لشكمانات بي إم دابليو المُنتجة في ألمانيا ….
طيب هل رقابة بي إم دابليو الأم كافية على مصنع مصر …
قابلت وأنا في زيارة المصنع …مهندس ألماني إسموا مايكل كينديرمان …ده مُمثل بي إم دابليو الأم في مصنع المجموعة البافارية في 6 أكتوبر …راجل ألماني عايش هو عائلته في مصر من 3 شهور ..مقيم إقامة دائمة في مصر وبيروح الشركة كل يون علشان يتأكد إن كل حاجة ماشية كما قال الكتاب …وبالمناسبة …كل الأدوات المستخدمة في تجميع طرازات بي إم دابليو في مصر هي أدوات “عالمية” …أدوات بتُستخدم في كل مصانع الشركة حول العالم ..وكل العاملين في المصنع واخدين تدريب على أعلى مستوى علشان ضمان الجودة …وعلى فكرة ..متنسوش إن مصنع مصر واحد من المصانع القليلة اللي جمعت الفئة السابعة حول العالم خارج ألمانيا …الكلام ده كان زمان ..بس لمعلوماتكم …الفئة السابعة الجديدة راجعة للتجميع في مصر قريب جدا !!
لما سألت المهندس الالماني عن كفائة العمال المصريين التقنية ..قال انهم ممتازين وعندهم “حب” و”شغف” لعملهم ……فلما لقيت السكة ماشية حلو باغت الراجل بسؤال عن “نسبة” مهارة العمالة المصرية مقارنة بالألمان …فالراجل جاوب بمنتهى الثقة إن الموضوع “مختلف” تماما ….في مصر العامل بيشتغل على عدد محدود من السيارات …وبيقدر يشوف العربية اللي اشتغل في تجميعها ..ولو فيها أي مشكلة بتبقى “في وشه” ! في ألمانيا العامل بيبقى مسؤل عن جزء صغير جدا من السيارت ..بيعدي عليه “ألاف ” السيارات في اليوم …فعملية انتاج السيارات بعدد محدود ده ميزة كبيرة …..ده كمان في مصر “كل” العربيات بتعدي على عملية فحص دقيقة بعد ما تخلص …مش زي ألمانيا بياخدوا “عينة” من ألاف العربيات اللي بينتجوها …مع العلم بان كل مصانع BMW في العالم عندها طريقة خاصة لتقييم كل عربية تطلع …وبيطلع شيت “بالأخطاء” …وبتتبعت النتائج للشركة الأم اللي بتعمل جرافات بتبين مستوى كل مصنع حول العالم …وإحنا في وسطهم ! والمدهش إن مستوى المصنع بتاعنا ممتاز جدا جدا مقارنة بمصانع كتير حول العالم ..الراجل ده هو عين BMW العالمية في مصر …وفي المصنع تحديدا …مش هيسمح بأي خطأ مُمكن ينتج عنه تفاوت في جودة أي عربية خارجة من المصنع …
طيب في النهاية البي إم دابليو المصري أحسن ولا الألماني ؟!
علشان أجاوب على السؤال ده …هناخد مثلا الفئة الخامسة الجديدة على سبيل المثال …العربية أول ما أتقدمت في السوق المصري بمحرك 1600 سي سي بسعر مليون و 250 ألف جنيه مصري …محرك متواضع الأداء بتجهيزات محدودة نوعا ما …لما العربية اتجمعت …بقت بتتقدم بمحرك 2000 سي سي بقوة 184 حصان و 290 نيوتن متر لنسخة 520i مع تجهيزات أكتر وبسعر مليون و 375 ألف جنيه مصري …..أما النسخة الأكثر “اثارة” اللي هي 530i ..فبتيجي بمحرك 2000 سي سي بردوا …بس بقوة 254 حصان و 350 نيوتن متر ..وبتجهيزات تخليها تقول “بابا وماما” ….فالتجميع هيخليك تاخد قوة أكبر ..وتجهيزات أعلى وبسعر أقل من لو كانت مستوردة ..طبعا العربية الألماني ليها “طعم” تاني ….بيجي من الإحساس “النفسي” انها جاية من “بلدها” …بس أنا هاخد القوة والتجهيزات والسعر الأفضل على حساب “الطعم” النفسي الوهمي ….
ايه رأيكم يا شباب …المصري ولا الألماني ؟!
