هموم قائدى الدراجات النارية

كتب: علي عبده

ركوب الدرجات النارية في مصر بقي منتشر بشكل محدش يقدر ينكره أبدا كهواية او الرياضة او حتي وسيلة موصلات رخيصة، رغم كده بنواجه مشاكل كتير بتأثر علينا بشدة ححاول نتكلم عن بعض منها و بعض الحلول ان امكن: –

１- المنع

 الموتوسيكلات ممنوعه من دخول أماكن كتير  بدون سبب واضح، مش عارف ليه يحسسك أنك داخل تفجر نفسك مثلا او انك داخل راكب حصان و لابس لبس من العصور الوسطي، من الاماكن دي مولات كتير بترفض دخول الموتوسيكلات لجرجتها ومدن ترفض دخول الدرجات النارية من الباب أساسا زي راس البر و المعمورة وشوارع ممنوع تمشي فيها بموتوسيكل زي  في بورسعيد و غيرهم. ممنوعين من دخول نوادي كتير، ممنوعين ندخل سيناء رغم اننا بندفع ضرائب ورسوم و معنا لوحات من المرور عشان نمشي في الشارع و ندخل الاماكن العربيات ممكن تدخله.

حاليا شبه تم منع استيراد دراجات نارية و تم وضح قيود صارمه علي استيرادها، الصراحة القرار ده مضحك جدا يعني لو بصينا لنوعيه الدراجات النارية الي بتكون سبب في كل المشاكل حنلاقي انها الموتوسيكلات الصيني و التكاتك و دي بيتم استيرادها كقطع غيار و تجميعها في مصر بشكل قانوني و زي ما كلنا شايفين اعداداها عامله ازي

ايه الفائدة علي المجتمع  من القرار لما في ١٠٠ طريقة عشان تلف حوليه، ايه المشكله الي انت حلتها كده ؟ كام واحد تضرر من القرار ده ؟

２- الطرق
مش محتاجين نتكلم عن الحفر والمطبات و البلاليع الي كل شويه واحد يلبس فيها و يتلقب يموت مفيش حد قبل كده ملبسش في حفرة او اتقلب علي شريط الترام او مسمعش عن واحد مات بسبب ان مفيش علامه تحذيرية علي تحويله او مفيش أضاءه علي طريق مفيش واحد بيركب موتوسيكل او اسكوتر الا عمل حادث او سمع عن حد عمل حادث و مات بسبب الطرق للأسف و الاهمال، ده غير السولار الي واقع من اتوبيسات النقل العام الي تنكها مش مقفول و العربيات النقل الي ماشيه توقع طوب علي الناس، لسه من كام يوم عربيه ماشيه جنبي طلعت فوق حجر في تحويله بدون أي علامات او تحذير و للأسف حال الاسره الي كانت في العربية يحزن.

３- سواقين العربيات

نخص بالذكر منهم سواقين الميكروباص والاتوبيس والتاكسي و يجب علينا الا نهمل دور الستات الي بتلبس ناس كتير في الرصيف او في أي حاجه ثابته او متحركة و متبصش في المراية و تكمل طريقها عادي، الحقيقة معظم الي سايق عربيه بيتعامل مع الي راكب موتوسيكل علي انه مواطن من الدرجة الثالثة يحق له خبطه و دهسه و احيانه قتله اذا اعترض الا من رحم ربي، ده غير الي ماشي زي التعبان يمين في شمال ولا كانه ماشي في صحرا حتي مستخسر يدي اشاره او يبص في المرايا، و الله الي راكب موتوسيكل بني ادم زيه زيك و ليه اسره تحزن عليه و ليه ناس معتمدين عليه في حياتهم و في ناس منتظرين يرجع لهم سليم،

حقولك علي فكره حلوه كل ما تيجي تغير حاره او تغير اتجاهك بص في المراية و لو كسلت افتكر انك ممكن تكون سبب في صوان عزاء و بكاء و حزن عيلة بالكامل او واحد راقد علي سرير في مستشفى بالشهور عشان يتعالج من أصابه سببها كسل حضرتك انك تبص في المرايه ثانيه او تدي اشارة، تخيل ان ممكن تكون سبب في أطفال ايتام او ست ارمله او ام مش بتفارق الدموع عنيها.

متزعلش من كلامي انا عيشت كله ده مع اهل ناس صحابي كتير ماتو و مش عايزك تشوف ده بعنيك

４- قطع الغيار والفنيين

تيجي تشتري موتوسيكل وتأخذ راي الناس يقولك بلاش ده خليك في كذا عشان ليه قطع غيار, الحقيقة ان كل الموتوسيكلات في مصر تقريبا ملهاش قطع غيار تقريبا الا كام موديل والموجود ليهم حاجات معينه محتاج حاجه تانية اطلب من بره غير ان معظم الموجود في السوق تقليد و صيني و ده الي شجعه ضعف معظم توكيلات الموتوسيكلات في مصر و عدم وجود ليها علي ارض الواقع يعني تروح توكيل ياماها تلاقي تاجر معروف لم كل قطع غيار الموتوسيكلات الي فيه عشان يحتكر الماركة دي و يبيع و يشتري في الي راكب ياماها بمزاجه و يبيع بأسعار مبالغ فيها و اذا كان عجبك، تيجي تطلب من التوكيل يقولك اجيب لك بعد شهرين يعني التوكيل بيسلمك لتاجر محتكر عشان يكسب و خلاص ميهموش المستخدم يحصل معاه ايه.
النقطة الأهم ان ميكانيكا كتير ميفهموش حاجه عن الميكانيكا او الموتوسيكلات عموما وشغالين بالبركة و ده بيسبب مشاكل كتير ملهاش حصر و خسائر لناس كتير و حوادث.

５- ناس كتير مش بتعرف تسوق

قليل جدا الي قراء او اتعلم سواقه بجد وده بيخلينا بنشوف حوادث كتير وناس بتموت لأبسط الاسباب و ناس كتير بتطلع رخص و هي في البيت و تروح تموت او تموت الناس، و ناس اكتر تقولك هات عربيه قديمه خبط بيها لحد ما تتعلم السواقه و ابقي هات واحده جديده، مسآلتش نفسك حيخبط في مين لحد ما يتعلم و يموت كام واحد ؟

６- الدولة مش مستوعبه ان دي رياضة وهواية ولو هم مش مقتنعين بيها برضو يتجاهلوها كوسيله موصلات بتقلل الزحام والتلوث واستهلاك الوقود يعني انا ليه لما أعدي علي بوابه الصحراوي ادفع ١٠ جنيه زي زي العربية الي تستهلك بزين مدعم اضعافي و بتنقل ٤ افراد؟ ليه بدفع جمارك زي زي العربية؟ ليه ممنوع ادخل جراج عام مثلا؟ في دول كتير بترفع الجمارك عن الدرجات النارية الصغيرة تمام عشان تشجع الناس تستخدمها و بتسمح لهم يركنو في أي ماكن مجانا حتي لو المكان ده ليه رسوم عشان تقلل من الزحام و تشجع الناس انها تستخدم الوسيلة دي.

７- جزء بقي مهم وهو وجهة نظر المجتمع للي بيركب موتوسيكل، زمان كنا نشوف الراجل الي بيركب موتوسيكل او فيسبا راجل محترم كده و بيروح الشغل و يجي بيه مكناش نسمع عن حد يجيب سيرة الي راكب موتوسيكل بسوء ابدا عشان مكنش في موتوسيكلات صيني، المشكلة مش في الموتوسيكل الصيني ابدا المشكلة في الي سايب ناس تمشي من غير نمر و رخص و تشغل مهرجانات و يخبطو في الناس و يعملو دوشه و مصائب كتير المفروض الشرطة تمسك كل واحد ماشي من غير لوحات او رخصه قيادة او خوذه و تعمل عقاب قوي للموضوع ده عشان ظاهرة موتوسيكلات المهرجانات تختفي و يرجع المجتمع يحترم الي بيركب موتوسيكل تاني
توضيح: المشكلة مش في الموتوسيكل الصيني المشكلة في تصرفات بعض الناس الي راكبه موتوسيكل صيني تسئ لكل الناس الي بتركب موتوسيكلات
.

الخلاصة فكرت في حلول للمشاكل دي ملقتش حل واضح او نقاط محدده بس الخلاص ان الدولة المفروض تعي اهميه الدرجات النارية ودورها في الحد من الزحام و التلوث و استهلاك الوقود، و تشجع الناس علي استخدامها من خلال اصدار قرارات تزيد من اهتمام الناس بالدرجات النارية في مصر زي مثلا: –

• اعفاء الدرجات النارية صغيره الحجم من الجمارك لتشجيع الناس علي استخدامها و الحد من الزحام.
• اعفاء الدرجات النارية من رسوم المرور في الطرق مثلا او تخفيضها.
• عدم اصدار رخص قيادة الا بعد اجتياز فترة تدريب في مكان متخصص و معتمد.
• تشديد العقوبات علي اي مخالفات تخص الطرق و حياة الناس.