كيف تحافظ على فتيس عربيتك الاوتوماتيك؟

ملحوظات مهمة بقي لكل واحد بيسوق عربية بفتيس أوتوماتيك

1 – لازم تبقى عارف إن العربية الأوتوماتيك مش هتدور وأنت على الـ D ولا هتدور وأنت على الـ R لأنه بـ إختصار الـ D و الـ R بيفصلوا كهربة عن المارش تماماّ وده مش هيخلى العربية تدور نهائى ..
2 – وأنت واقف فى إشارة هات الـ N اللى هو وضع المور عشان تريح تروس الفتيس شوية ومتلفش على الفاضى وتبقى العربية عايزة تطلع وأنت ماسكها فرامل ..
3 – وأنت بتجيب الـ D أو الـ R خلى رجلك على الفرامل لأنك لو جبت حاجة من دول من غير فرامل هتلاقى العربية مشيت من غير ما تدوس بنزين لأن التروس أتحركت وحركت العربية معاها ..
4 – مينفعش تنقل من نقلة لـ نقلة والعربية ماشية حتى لو ماشية على سرعة 5 كم يعنى مينفعش مثلاّ وأنت بتطلع من ركنة وجايب الـ D والعربية لسة بالراحة أوى أهى وبتطلع من الركنة تروح جايب الـ R عشان تعدل نفسك وتطلع!! لأ أنت كدة بتدمر تروس الفتيس مع الوقت لأن لازم العربية تقف وتروح جاى ناقل من الـ D للـ R والعكس ..
5 – نيجى بقى للأوضاع التانية وهى الـ L و الـ 2 والـ 3 :-

الـ L هو الغيار الأولانى وده الناس بتستخدمة فى المطالع الجامدة لأنه بيدى عزم شديد على سرعة قليلة بس خد بالك مينفعش تكون ماشى 60 ولا 80 وتروح جايب الـ L !! أنت كدة هتكسر الفتيس يعني أخرك 30 بالكتير تجيب الـ L عليها ..

الـ 2 وده الغيار التانى والأول مع بعض بيسمح للعربية إنها تننقل ما بينهم ..
الـ 3 وده الغيار الأول والتانى والتالت فقط مش بتنقل للرابع ..
ممكن عادى وأنت ماشى على الـ L أو الـ 2 أو الـ 3 تجيب الـ D مرة واحدة عادى لأنه كدة كدة شغال على جميع النقلات ف أى وقت عادى ..
6 – نصيحة ياريت الكل يعمل بيها لو عايز تحافظ على فتيس عربيتك .. وأنت بتركن أو بتقف بالعربية متروحش جايب الـ P مرة واحدة ومتشدش الهاند أو تجيب الـ P وتشد الهاند بعدها ..

الوقفة الصح بالفتيس الأوتو هو إنك خلاص هتبطل أهو وتنزل من العربية ركز بقى معايا .. تروح دايس فرامل وتجيب الـ N وترفع الهاند وبعد كدة تجيب الـ P

3 خطوات أهو من الشمال لليمين لازم تلتزم بيهم ده لو خايف علي فلوسك يعني والـ 3 خطوات دول معناهم إن أنت كدة حملت على الهاند بريك واللى وظيفتها إنها توقف العربية
لكن لما بتجيب الـ P وبعد كدة الهاند أنت كدة حملت العربية كلها بالمكنة بكله على ترس الفتيس ومع الوقت بيتاكل ويتكسر وترجع تقول ليه ده أنا كنت محافظ على العربية ..