فيات باندا .. أسال مجرب ولا تسأل طبيب
كتب: على عبده
في سنة ١٩٨٠ فيات قدمت لنا Fiat Panda كعربية مناسبة للمدينة وحصل عليها تطورات كثيرة وتغييرات لحد ما وصل لنا الشكل الي موجود دلوقتي، العربية لاقت نجاحا عالميا ولا تزال موجودة في بلاد كثيرة لدرجة ان شركة جريت وول الصينية قامت بتقليدها وتصنيع سيارة اسمها بيري .
اليوم نقدم لكم تجربة شخصية من واقع الخبرة والتجربة الشخصية للسيارة فيات باندا ٢٠١٧ .. و زي ما بيقولو أسال مجرب ولا تسأل طبيب .. التجربة دي واقعية من خلال اقتنائي للعربية الشقيه دي.
من وجهة نظري الشخصية تعتبر فيات باندا الإصدار الرخيص في حجم عملي من الأيقونة فيات 500 فهى سيارة إيطالي بكل ما تعنيه تلك الكلمة سواء فى القيادة على الطريق فقيادتها اكتر من ممتعة او تصميمها الشيك المختلف عن اي عربيه في الشارع او الونها الي مفيش زيها.
العربية ثابته جدا علي الطريق رغم حجمها الصغير.. فرامل خرافية .. ممتازة فى المناوره، انظمة التعليف فيها جيدة، قد تكون ناشفه شوية في الطرق الغير ممهدة بس ده بيوفر الثبات اللازم مقابل ارتفاع العربية.
المقصوره الداخلية مش اقل جمال من الشكل الخارجي و كمان تحس فيها حاجه مختلفه عن اي عربيه، مكان عصايه الفتيس مريح جدا و بيخلي النقل بين السرعات سهل بالاخص مع دوسات الدبرياج المعتمده علي نطام ضغط الزيت مش كبل، بالمناسبه لو ركبت العربيه دي حتلاحظ ان لما ترفع رجلك مع علي دواسه الدربياج ان الار بي ام بيعلي شويه و ده عشان العربيه متبطلش منك لو مش متعود عليها. الخامات الداخليه و متسوي التقفيل للعربيه دي حلو جدا و في شويه لمسات تظهر شطارة الصانع الايطالي.
فيات باندا مزودة بعجلة قيادة ناعمه جدا تتلف بأصبع واحد و ده بيخليها في الزحمه زي الريشة ، العربية بقارنتها بالسيارة جراند بونتو التى كنت امتلكها من قبل ممتازة .. رغم ان جراند بونتو اكتر عربيات فيات في مصر نجاح و انتشار .. الا اننى اعترف أن فيات باندا سيارة ممتازة واحلي و أكثر ثباتا على الطريق وتوفر متعة القيادة واسهل في السواقة وممتعة اكتر رغم اختلاف الحجم.
فيات باندا مزودة بمحرك ١٢٠٠ سي سي بقوة ٦٩ حصان وعزم ١٠٢ نيوتن وسحبها ممتاز وتصل سرعتها القصوى ١٧٠ تقريبا حسب الكتالوج وتنطلق من الثبات الى سرعة ١٠٠ كم خلال حوالي ١٤ ثانية وتكييفها كويس جدا و مش بياثر عليه تأثير ملحوظ.العربية بتنزل مصر فئه واحده فقط بناقل حركة مانيول ٥ سرعات سعرها الرسمي ١٩٤ الف بس في معارض كتير بتعمل عليها خصومات كويسه
العربية يتوفر فيها الاتي– أي بي اس– أي بي دي– ايه اس ار– ٤ اير باجز– زجاج خلفي و جانبي ملون– نظام hill assist – حساس ضغط كاوتش– حساس درجه حراره الجو– غير الحاجات الطبيعية زي التكييف وكاسيت وسنتر لوك بريموت وامكانية تعديل وضعية عجلة القيادة ومريات كهرباء– كمبيوتر رحلات– أضواء نهارية– الدركسيون كهرباء
ابعاد العربية طول 3.653 متر وعرض 1.643 متر وارتفاع 1.551 متر دفع أمامي. العربية مرتفعة عن الارض ومش بتحك في المطبات تماما.
صالون فيات باندا تصميمه شيك وجديد، واسع ومريح .. كرسي السواق ممكن تظبط وضعيته.. المساحة الخلفية حلوه والشنطة معقولة بالنسبة لعربية بالحجم ده ، بالنسبة للعزل بتاع العربية جيد جدا حتي علي السرعة ١٢٠ بعد كده تسمع صوت الهواء شوية .. العربية بتنزل من غير استبن بس فيها نظام فيكس اند جو عبارة عن كمبريسور ونظام لحام للكاوتش تقدر تستخدمة بكل سهوله .. ترخيص العربية يبلغ تقريبا ١٠٠٠–١٢٠٠ لاول مرة حسب المرور اللي انت فيه
استهلاك البنزين في باندا كويس جدا يعني مثلا لو بتروح الشغل مشوار حوالي ٢٥–٣٠ كم رايح وزيهم جاي ٦ مرات في الاسبوع مع مشوارين كده بعد الظهر حتحط بـ ١٠٠ جنيه بنزين تقريبا
العربية مناسبة جدا لأسرة صغيرة فيها طفلين او شاب في الجامعة .. مناسبة جدا للسفر لاي مكان تتخيله في المطبات ممتازة ومش بتحك في اي حاجة ، صعب نقارن العربية الصراحة مع البيكانتو او الـ i10 سواء في الامكانيات او في الجودة والثبات او حتي السعر .. أول صيانة للعربية بعد ١٠ الف كم مفيش حاجة اسمه تلين في العربية وبتتكلف حوالى ١٢٠٠ جنيه تقريبا
